Human | sa únos

Ang kalinaw | mobanós; 

Tápos | sa bagyo

Ang huyóhoy | mobaylo

Ingon karon | nga búlan: 

Nga batobaláni | sa katalagman, 

Pag-alisdan | ra usab  

Sa taknang | kasadyáan 

Daw ako | sakayánon  

Naglayág | sa kagabhion 

Hiatlan ngadto | sa láwod  

Sa hánging | naghagurós 

Ug giabót | ako didto 

Sa kalísang | nga dako 

Nakapakulba | kanáko 

Sakayánon | nga aláot  

Dinag-an | sa únos 

Linupigán | sa paghurós  

Sakayan | ko pang giyugyog

Pagláom | ko gitandog   

Ingon ning búlan | sa Nobyembre 

Dinakdakán | sa kasákit  

Sa bagyo | wala hunóngi  

Makabugto | sa alegre  

Apan ako | nga malaómon  

Sa pagtanggong | ko sa láwod  

Gihangád | ko mga tungdonon 

Ug gikítâ | ko kaayo:   

Bitúon | malamdágon  

Pinaábot | ko nga signos 

Takós | nga talan-awon  

Maháyag | nga tilimad-on 

Bitóong | nagadan-ag 

Sa grasya | nagpadayág 

Sa dagway | nakapasanag 

Tumán | nga pagkaanyag 

Naghinultol | kanako 

Sa mangitngit | nga lawod 

Nag-agak | kanako 

Sa piliw ug | baybayon 

Ug busa sa | kahinangop 

Nga gibati | ko’g makusog 

Ako kining | gikutlo 

Gikan sa langit | niyang puwesto

Gidala ko | sa amò

Sa dughan ko | gisapupò 

Sa nahiabot | na ako 

Gisab-it ko | sa bungbong 

Nan sa among | balay 

Kini | nagbitay-bitay 

Nagdala og | kalipay 

Lakip na | paglaom 

Apan wala | pa matapos 

Kay may milagro | pa gayod 

Nga gibuhat | kanako 

Aron sa ákong | paghimuyo 

Dunay ákong | nadungog 

Kalit láman | mitingog 

Sa mahinay | nga pulong  

Ang bitoon | mihunghong:  

Human | sa únos

Ang kalinaw | mobanós; 

Tápos | sa bagyo

Ang huyóhoy | mobaylo